خیبر پختونخوا: قبائلی اضلاع میں انتخابات مؤخر

June 12, 2019 2:15 pm0 commentsViews: 3

اسلام آباد: الیکشن کمیشن نے خیبرپختونخوا حکومت کی درخواست پر قبائلی اضلاع میں صوبائی اسمبلی کی 16 نشستوں کے لیے 2 جولائی کو ہونے والے انتخابات 18 روز کے لیے مؤخر کردیے۔ نجی ٹی وی کے مطابق ترجمان الیکشن کمیشن الطاف خان کا کہنا ہے کہ چیف الیکشن کمشنر جسٹس (ر) سردار محمد رضا کی زیر صدارت قبائلی اضلاع (سابق فاٹا) میں صوبائی اسمبلی کی 16 نشستوں پر انتخابات سے متعلق اہم اجلاس ہوا۔

اجلاس کے دوران خیبرپختونخوا حکومت کی جانب سے موصول درخواست کا جائزہ لیا گیا جس کے بعد کمیشن نے فیصلہ کیا کہ قبائلی اضلاع کی نشستوں کے لیے انتخابات 20 جولائی کو ہوں گے۔ واضح رہے کہ خیبرپختونخوا حکومت نے الیکشن کمیشن کو لکھے گئے خط میں امن و امان کی خراب صورتحال پر الیکشن ملتوی کرنے کی درخواست کی تھی۔

خیبرپختونخوا حکومت نے مؤقف اختیار کیا تھا کہ افغانستان سے دہشت گرد حملوں کے خطرات ہیں، سیاسی قیادت کو بھی نشانہ بنانے کے حوالے سے خدشات موجود ہیں اس لیے الیکشن 20 روز کے لیے ملتوی کیے جائیں۔