سڑک کنارے اور فٹ پاتھ پر قائم تجاوزات کا صفایا

October 21, 2019 12:18 pm0 commentsViews: 9

محکمہ انسداد تجاوزات کے سینئر ڈائریکٹر لینڈ بشیر صدیقی کی زیر نگرانی ضلع وسطی میں کریک ڈائون
ریسٹورنٹس کے سامنے لگائی گئیں کرسیاں اور میزیں لائٹوں کے پول اکھاڑ کر ضبط کرلئے گئے
کراچی (اسٹاف رپورٹر) محکمہ انسداد تجاوزات کے سینئر ڈائریکٹر لینڈ بشیر صدیقی کی زیر نگرانی ضلع وسطی کے علاقے نارتھ کراچی پاور ہائوس چورنگی سے سرجانی ٹائون فور کے چورنگی سڑک کے کنارے اور فٹ پاتھ پر قائم تجاوزات کے خلاف کارروائی کی گئی۔ اس موقع پر ڈپٹی ڈائریکٹر لینڈ انکروچمنٹ یونس خان نے علاقہ پولیس کے ہمراہ بھرپور کارروائی کرتے ہوئے تجاوزات کا صفایا کرتے ہوئے پتھارے، ٹھیلے اور اسٹالوں سمیت دیگر سامان کو نہ صرف ضبط کر لیا بلکہ دکانوں کے باہر قائم کی جانے والی تجاوزات کو بھی مسمار کر دیا، انسداد تجاوزات کے عملے نے ریسٹورنٹس کے سامنے گاہکوں کے بیٹھنے کے لیے لگائی گئیں میزیں، کرسیاں اور روشنی کے لیے لگائی جانے والی لائٹوں کے پول بھی اکھاڑ کر ضبط کر لیے، اس موقع پر ڈپٹی ڈائریکٹر یونس خان کا کہنا تھا کہ اعلیٰ حکام کی ہدایت پر تجاوزات کے خلاف جاری کارروائی میں کسی بھی دبائو کو ہرگز قبول نہیں کیا جائے گا اور جو بھی خلاف ورزی کا مرتکب پایا جائے گا اس کا نہ صرف سامان ضبط کر لیا جائے گا بلکہ اس کے خلاف قانونی کارروائی بھی عمل میں لائی جائے گی۔