دنیا بھر سے سکھ پہنچ گئے ٗ کرتار پور راہددار ی کا افتتاح آج وزیراعظم کرینگے

November 9, 2019 12:48 pm0 commentsViews: 1

اسلام آباد (اے پی پی) وزیراعظم عمران خان سکھ مذہب کے بانی بابا گرونانک دیوجی کے 550 ویں جنم دن کے موقع پر بین المذاہب ہم آہنگی کے جذبے کے تحت کرتارپور راہداری کے منصوبے کا آج ہفتہ کو افتتاح کریں گے۔ بھارت سمیت دنیا بھر سے سکھ یاتریوں کی بابا گرونانک کے جنم دن کی تقریبات میں شرکت کے لیے آمد کا سلسلہ جاری ہے۔ جنم دن کی تقریبات میں 10 ہزار سے زائد سکھ یاتری شرکت کریں گے، راہداری کی تعمیر کے بعد روزانہ 5 ہزار سکھ یاتری گوردوارہ دربار صاحب کی یاترا اور وہاں اپنی مذہبی رسومات کی ادائیگی کے لیے آسکیں گے، اس منصوبے کے لیے فنڈز مکمل طور پر پاکستان نے فراہم کیے ہیں اور یہ سکھ برادری کے لیے ایک تحفہ ہے۔ اس راہداری کا مقصد سکھ برادری کو پاک بھارت سرحد سے محض 4.7 کلومیٹر کے فاصلے پر واقع گردوارہ دربار صاحب کی یاترا میں آسانی پیدا کرنا ہے، یاتریوں کی سہولت کے لیے حکومت پاکستان نے خصوصی ٹرینیں بھی چلائی ہیں، اس موقع پر سیکورٹی کے بھی خصوصی انتظامات کیے گئے ہیں۔