وزیراعظم آج کرتارپور راہداری کا افتتاح کریں گے

November 9, 2019 1:08 pm0 commentsViews: 1

لاہور: وزیراعظم عمران خان آج کرتار پور راہداری اور دنیا کے سب سے بڑے گوردوارے دربار صاحب کا افتتاح کریں گے۔ نجی ٹی وی کی رپورٹ کے مطابق دنیا بھر میں بسنے والے سکھوں کی 72 سال کی دعائیں قبول ہوگئیں، وزیراعظم عمران خان آج کرتارپو ر راہداری کا افتتاح کریں گے اوریہ منصوبہ 10 ماہ کی قلیل مدت میں مکمل کیا گیا ہے۔

تفصیلات کے مطابق راہداری کی تعمیر کے ساتھ پاکستان میں موجود سکھوں کے دوسرے مقدس ترین مقام گوردوارہ دربار صاحب میں بھی توسیع کی گئی ہے، 44 ایکڑ رقبے پر مشتمل دنیا کا یہ سب سے بڑا گوردوارہ ہے، سکھ یاتری 72 سال کی دعائیں پوری ہونے پر خاصے خوش دکھائی دے رہے ہیں۔
افتتاحی تقریب کا آغاز صبح 11 بجے ہوگا، پنڈال میں 6 ہزارسے زائد مہمانوں کے لیے کرسیاں لگائی گئی ہیں، وزیراعظم عمران خان منصوبے کا افتتاح، راہداری کا وزٹ اور تقریب سے خطاب کریں گے جب کہ بھارت سے آئے ہوئے مہانوں کے نمائندے بھی اظہار خیال کریں گے، اس حوالے سے تمام تیاریاں مکمل کرلی گئی ہیں۔

کرتارپور راہداری کی افتتاحی تقریب میں جہاں بھارت سمیت مختلف ممالک سے آئے ہوئے ہزاروں سکھ یاتری شریک ہوں گے وہیں سابق بھارتی کرکٹر اور عمران خان کے دوست نوجوت سنگھ سدھو بھی شریک ہوں گے۔

سابق بھارتی وزیراعظم ڈاکٹرمنموہن سنگھ، مشرقی پنجاب کے وزیراعلیٰ کیپٹن امریندر سنگھ اور اداکار اور ممبر پارلیمنٹ سنی دیول سمیت دیگر گئی بھارتی مہمان بھی راہداری کے راستے گوردوارہ دربارصاحب آئیں گے۔

پاکستان نے خیرسگالی طور پر کرتار پور راہداری کے راستے آنے والے پہلے وفد سے 20 ڈالر سروس فیس نہ لینے کا فیصلہ کیا ہے، انٹری کے لیے کارآمد بھارتی پاسپورٹ اور 10 دن پہلے رجسٹریشن لازمی ہے۔

وزیراعظم عمران خان نے خیرسگالی طور پر ایک سال کے لیے بھارتی یاتریوں کے لیئے پاسپورٹ اور 10 دن پہلے رجسٹریشن کی شرط ہٹانے کا اعلان کیا تھا تاہم بھارت کی طرف پاکستان مخالف پراپیگنڈے اور اپنی طرف سے پاسپورٹ کی شرط ختم نہ کیے جانے کے بعد ترجمان دفتر خارجہ کی طرف سے کہا گیا ہے کہ اگر پاکستان کی طرف سے دی جاری رعایت پر اعتراض ہے تو ہم باہمی معاہدے پر عمل درآمد کریں گے۔

واضح رہے کہ اس منصوبے کا سنگ بنیاد گزشتہ سال 28 نومبر کو رکھا گیا تھا، منصوبے کا پہلا فیز مکمل ہوگیا ہے جس کا افتتاح آج ہونے جارہا ہے، دوسرے مرحلے میں یہاں اعلیٰ معیار کے ہوٹل، ریسٹورنٹ اور شاپنگ مال تیار ہوں گے۔