خاتون پولیس افسر کی محبت کے جال میں پھنس کر بدنام زمانہ ڈاکو گرفتار

December 2, 2019 1:52 pm0 commentsViews: 4

چھلاوا بننے والے ڈاکو کو خاتون پولیس سب انسپکٹر نے شادی کی پیشکش کرکے دھوکے سے بلایا
مدھاوی نے اپنی پرانی تصاویر اور شادی کی پیشکش کا خط مخبر کے ذریعے55 سالہ ڈاکو تک پہنچایا
مدھیہ پردیش(مانیٹرنگ ڈیسک) بھارت میں پولیس کے لیے چھلاوا بننے والے بدنام زمانہ ڈاکو کو خاتون پولیس سب انسپکٹر نے شادی کی پیشکش کرکے دھوکے سے بلایا اور گرفتار کرلیا۔بھارتی میڈیا کے مطابق ریاست مدھیہ پردیش میں ہر بار پولیس کو چکمہ دینے میں کامیاب ہونے والے 55 سالہ بدنام زمانہ ڈاکو بل کرشنا چوبئے کو پولیس نے انوکھی حکمت عملی سے گرفتار کرکے عدالت میں پیش کردیا۔قتل، ڈکیتی اور چوری کی درجنوں مقدمات میں مطلوب ڈاکو کی گرفتاری میں 30 سالہ خاتون سب انسپکٹر مدھاوی اگنی ہوتری نے مرکزی کردار ادا کیا۔ ڈاکو نے اپنے چیلوں سے شادی کی خواہش کا اظہار کرتے ہوئے رشتہ ڈھونڈنے کا تذکرہ کیا تھا۔ایک مخبر کے ذریعے یہ خبر پولیس تک پہنچ گئی جس پر مدھاوی نے اپنی پرانی تصاویر اور شادی کی پیشکش کا خط مخبر کے ذریعے ڈاکو تک پہنچایا، کچھ دنوں کی خط و کتابت کے بعد ڈاکو دام میں آگیا۔دونوں نے شادی سے قبل ایک دوسرے سے دوبدو ملاقات طے کی اور عین ملاقات کے دوران گھات لگائے سادہ لباس میں ملبوس پولیس اہلکاروں کی ٹیم نے ڈاکو کو گرفتار کرلیا۔