امتیاز شیخ نے ایس ایس پی شکار پور کو ہرجانے کا نوٹس بھجوا دیا

January 23, 2020 1:14 pm0 commentsViews: 4

14روز میں جھوٹے اور من گھڑت الزامات پر ڈاکٹر رضوان معافی مانگیں‘ نوٹس کا متن
ڈاکٹر رضوان کے پاس میرے متعلق کوئی شواہد تھے تو کارروائی کیوں نہیں کی؟صوبائی وزیر
کراچی(اسٹاف رپورٹر)سندھ کے وزیر توانائی امتیازاحمدشیخ نے ایس ایس پی شکار پور ڈاکٹررضوان کو ایک ارب ہرجانے کا لیگل نوٹس بھجوا دیاہے ،14روز میں جھوٹے اور من گھڑت الزامات پر معافی مانگیں۔امتیاز شیخ کی جانب سے ایس ایس پی شکار پور کو بھجوائے گئے نوٹس کے متن کے مطابق معافی نہ مانگی تو عدالتی کارروائی کا آغاز کردیا جائے گا ۔نوٹس میں کہا گیا ہے کہ ایس ایس پی شکارپور کی جانب سے مبینہ سیکرٹ رپورٹ جاری کی گئی ہے جس کا حقیقت سے کوئی تعلق نہیں ہے۔نوٹس میں کہا گیا ہے کہ ڈاکٹر رضوان کی تعیناتی کے بعد امن و امان کی صورتحال بد سے بدتر ہوتی جارہی ہے، متعدد بار نشاندہی کرنے کے باوجود حالات تبدیل نہیں ہوئے۔انہوں نے نوٹس میں کہا کہ ڈاکٹر رضوان ہمیشہ مجھے بڑے بھائی کا لقب دیتے رہے، اگر ڈاکٹر رضوان کے پاس میرے یا میرے خاندان سے متعلق کوئی شواہد تھے تو کارروائی کیوں نہیں کی؟