یوٹیلٹی اسٹورز پر مہنگے داموں اشیاء کی فروخت، وزیر اعظم کا نوٹس

February 13, 2020 1:33 pm0 commentsViews: 1

دالیں،چاول مارکیٹ کے مقابلے میں10سے25روپے فی کلو سستے فروخت کیے جائیں
چینی 68‘ گھی 170، 20 کلو آٹے کا تھیلا 800 روپے میں فروخت کیا جائے‘ ٹوئٹر پر بیان
اسلام آباد(مانیٹرنگ ڈیسک)وزیراعظم عمران خان نے یوٹیلٹی اسٹورز پر اشیاء مہنگے داموں فروخت ہونے کا نوٹس لیتے ہوئے قیمتیں کم کرنے کی ہدایت کردی۔سماجی رابطے کی ویب سائٹ ٹویٹر پر معاونِ خصوصی برائے اطلاعات نے بیان جاری کیا کہ وزیراعظم نے یوٹیلٹی اسٹورز پر اشیاکوکم نرخوں پرفروخت نہ کرنے کا نوٹس لیتے ہوئے مالکان کو چینی 68 روپے فی کلو فروخت کرنے کی ہدایت کی۔فردوس عاشق اعوان کے مطابق وزیر اعظم نے ہدایت کی کہ یوٹیلٹی اسٹورز پر گھی 170، 20 کلو آٹے کا تھیلا 800 روپے میں فروخت کیا جائے، علاوہ ازیں دالیں،چاول مارکیٹ کے مقابلے میں10سے25روپے فی کلو سستے فروخت کیے جائیں۔اْن کا کہنا تھا کہ وزیراعظم عمران خان عوام کا احساس اور درد رکھتے ہیں اور اْن کا ایجنڈا عوام کو ریلیف فراہم کرتے ہوئے اْن کی زندگیوں کو آسان بنانا ہے۔فردوس عاشق اعوان کا کہنا تھا کہ اشیاء کی قیمتوں میں استحکام اور بروقت فراہمی کو یقینی بنانا ہوگا۔یاد رہے کہ ایک روز قبل وفاقی کابینہ کے اجلاس میں وزیر اعظم عمران خان نے مہنگائی پر قابو پانے کے لیے نوجوانوں کو نئی دکانیں کھول کر دینے کی ہدایت کی تھی۔