مارکیٹوں میں جم غفیر کے نتائج کے ذمہ دار عوام خود ہوں گے ، مشیر صحت

May 22, 2020 2:10 pm0 commentsViews: 9

اسلام آباد: معاون خصوصی برائے صحت ڈاکٹر ظفر مرزا کا کہنا ہے کہ ملک میں کورونا کے باعث خراب صورت حال کا ذمہ دار عوام خود ہوں گے۔ نجی ٹی وی کی رپورٹ ک مطابق اسلام آباد میں پریس کانفرنس کے دوران بات کرتے ہوئے ڈاکٹر ظفر مرزا کا کہنا تھا کہ موجودہ صورت حال تشویشناک ہے، گزشتہ روز کورونا وائرس سے 50 اموات ہوئیں،ایک دن میں اموا ت کی یہ سب سے زیادہ تعداد ہے، احتیاط نہ کی گئی تو کورونا کیسز میں مزید اضافہ ہوگا، ہمیں کورونا وائرس سے بچاوَ کے لیے ہمیں خود کو اور دوسروں کو بچانا ہے۔ سماجی فاصلے کا خیال نہیں رکھیں گے تو صورتحال خراب ہوسکتی ہے، آپ کسی کو ذمہ دار نہیں ٹھہرا سکتے، اس کے نتائج کے ذمہ دار آپ خود ہوں گے۔

تفصیلات کے مطابق ظفر مرزا کا کہنا تھا کہ مارکیٹوں اور دکانوں میں لوگوں کا جم غفیر دیکھا جارہا ہے، عوام کے لیے رش والی جگہوں میں ماسک پہننا لازمی قرار دیا گیا ہے۔ عوام سے اپیل ہے کہ 50 سال سے زائد عمر کے لوگ جمعتہ الوداع کے اجتماعات میں جانے سے گریز کریں، عید کی نمازگھروں پر ادا کریں تو اس سے اچھی کوئی بات نہیں۔ عید پر ہمیں ایک دوسرے سے گلے نہیں ملنا، ایک دوسرے سے فاصلہ رکھنا ہے، ہم دور رہ کر ایک دوسرے کو عید کی مبارک دے سکتے ہیں۔