شہباز شریف کا وزیراعظم عمران خان اور وزیراعلی پنجاب کے استعفے کا مطالبہ

May 22, 2020 2:32 pm0 commentsViews:

لاہور: پاکستان مسلم لیگ (ن) کے صدر شہباز شریف نے وزیراعظم عمران خان اور وزیراعلی پنجاب کے استعفے کا مطالبہ کردیا ہے۔ نجی ٹی وی کی رپورٹ کے مطابق اپنے بیان میں شہباز شریف نے کہا کہ وزیراعظم اقتصادی رابطہ کمیٹی اور کابینہ کے سربراہ کے طورپر ہر فیصلے کا ذمہ دار ہے، دوسروں کو قربانی کا بکرا بنانے سے عمران خان کی ذمہ داری ختم نہیں ہوگی، آٹا چینی چوری کے تمام فیصلوں کی منظوری عمران خان نے دی، عمران خان نے قوم سے لوٹ مار کا لائسنس دیا، اس پر دستخط عمران خان نے کئے، عمران خان نے پہلے قومی خزانہ لوٹنے کی اجازت دی پھر کہا جنہوں نے لوٹا ہے ان کو گرفتار کرلو۔

تفصیلات کے مطابق شہباز شریف نے مزید کہا کہ عوام کی چینی چوری کرنے والے گروہ کے سرغنہ کا نام وزیر اعظم عمران خان ہے، چینی باہر بھیجنے کی اجازت دینے سے لے کر اس کی ذخیرہ اندوزی اور مقامی مارکیٹ میں مہنگی فروخت عمران خان کے جرائم ہیں۔ قوم کو لوٹنے کی اجازت دینے والے وزیراعظم عمران خان مستعفی ہوں۔