فیصل واوڈا کا الیکشن کمیشن کے فیصلے کیخلاف سندھ ہائی کورٹ سے رجوع

March 8, 2021 12:53 pm0 commentsViews: 26

کراچی: پاکستان تحریک انصاف کے رہنما اور سندھ سے رکن قومی اسمبلی فیصل واوڈا نے الیکشن کمیشن کے فیصلے کے خلاف سندھ ہائی کورٹ سے رجوع کرلیا ہے۔ نجی ٹی وی کی رپورٹ کے مطابق انہوں نے استدعا کی ہے کہ الیکشن کمیشن کو میرے خلاف نااہلی کیس سے روکا جائے۔ وفاقی وزیر نے الیکشن کمیشن کے 24 فروری کے فیصلے کو چیلنج کیا ہے۔

تفصیلات کے مطابق پی ٹی آئی رہنما نے مؤقف اپنایا کہ الیکشن کمیشن نے حقائق کے برخلاف میری درخواست مسترد کی۔ الیکشن کمیشن کو میرے خلاف شکایات سننے کا اختیار نہیں۔ رہنما پی ٹی آئی فیصل واوڈا نےحکم امتناع کی بھی استدعا کی ہے۔

تفصیلات کے مطابق سندھ ہائی کورٹ نے فیصل واوڈا درخواست منظور کرلی ہے اور کل اس پر سماعت ہوگی۔ خیال رہے کہ فیصل واوڈا کی دوہری شہریت پرالیکشن کمیشن میں 3شکایات درج ہیں۔ درخواست کے متن میں درج ہے کہ 2018الیکشن کے نامزدگی فارم جمع کراتے ہوئے فیصل واوڈا امریکی شہریت رکھتے تھے اور پی ٹی آئی رہنما نے جھوٹا حلف نامہ جمع کرایا۔

فیصل واوڈا نے جھوٹا حلف دے کر بددیانتی کی، وفاقی وزیر کو دہری شہریت رکھنے اور جھوٹا حلف نامہ دینے پر نااہل کیا جائے اوربطور وزیر کام کرنے سے روکا جائے۔

عدالت سے استدعا کی گئی ہے کہ فیصل واوڈا کو نا اہل قرار دے کر کراچی کے حلقہ این اے 249 میں دوبارہ انتخابات کرائے جائیں۔