کراچی : کالعدم تحریک لبیک کے 25سے زائد ملزمان کی ضمانت منظور

April 30, 2021 3:24 pm0 commentsViews: 38

کراچی: انسداد دہشتگردی کی خصوصی عدالت نے کالعدم تحریک لبیک پاکستان کے سربراہ سعد رضوی کی گرفتاری کے بعد شہر میں ہنگامہ آرائی کے مقدمے میں 25سے زائد ملزمان کی ضمانت منظور کرلی۔ نجی ٹی وی کی رپورٹ کے مطابق کراچی کی انسداد دہشتگردی کی خصوصی عدالت کے روبرو کالعدم تحریک لبیک پاکستان کے سربراہ سعد رضوی کی گرفتاری کے بعد شہر میں ہنگامہ آرائی سے متعلق کیس کی سماعت ہوئی۔

تفصیلات کے مطابق کالعدم تحریک لبیک کے 25سے زائد کارکنان عدالت میں پیش ہوئے۔ عدالت نے ملزمان کی فی کس 30ہزار روپے کے عوض ضمانت منظور کرلی۔

عدالت نے ضمانتی مچلکے جمع کروانے پر ملزمان کو رہا کرنے کا حکم دیدیا۔ پولیس کے مطابق کالعدم تحریک لبیک کے سربراہ سعد رضوی کی گرفتار کے بعد ملزمان نے ہنگامہ آرائی کی، انہوں نے ایئر پورٹ اور نیو کراچی تھانے کی حدود میں جلاؤ گھیراؤ کیا اور شہریوں کی املاک کو نقصان پہنچایا۔